A aplicación para xestión da produción do sector auxiliar do naval pretende resolver principalmente o problema da planificación nas empresas pertencentes ó sector. Para elo desenvolvéronse unha serie de funcionalidades que dan solución a certos problemas detectados durante a análise do proxecto. Sen embargo, a solucións propostas para as problemáticas xurdidas non deben ser vistas como exclusivas do sector naval, senón que poden ser útiles para calquera empresa á que os conceptos base utilizados lle sexan aplicables.
Tal e como se visualiza na anterior captura, a principal pantalla da aplicación e a vista global da empresa, unha vista na que o usuario poderá visualizar a lista de proxectos planificados para coñecer o estado global da empresa, tanto a nivel de pedidos, como de uso de recursos. A vista global de empresa está, asimesmo, formada por 3 perspectivas:
* Vista dos pedidos e a sua temporalidade: Cada proxecto é unha caixa de diagramas de Gantt indicando a data de comezo e de fin do proxecto. Ademais, combínase dita información co amosado da data acordada de finalización (*deadline*) e con un contraste entre porcentaxe de avance e horas adicadas realmente a cada proxecto. Esta información da unha visión clara de como se atopa a empresa nun momento dado. Esta vista é a portada da aplicación.
* Gráfica de uso dos recursos da empresa: Gráfica que busca a información de asignacións dos recursos ós proxectos e que ofrece un resumo de como está o uso dos recursos de toda a empresa: a cor verde indica asignacións de recursos por debaixo do 100%, a liña negra indica a carga dispoñible de recursos e a cor amarela indica as asignacións a recursos que están por enriba do 100%. É posible dispor de menos asignacións que recursos dispoñibles e ó mesmo tempo contar con sobreasignacións en recursos concretos.
* Vista de carga de recursos: Pantalla que amosa o listado de traballadores da empresa e a carga debido a asignacións específicas a tarefas ou asignacións xenéricas debido a que o recurso satisfai unha lista de criterios. Ver a seguinte imaxe. Para acceder a esta vista é necesario premer en *Carga global de recursos*.
* Vista de administración de pedidos. Pantalla que amosa o listado de pedidos da empresa onde o usuario poderá realizar as seguintes operacións: filtrar, editar, borrar, visualizar en planificación ou crear novo pedido. Para acceder a esta vista é necesario premer en *Lista de pedidos*.
A xestión de perspectivas que se comentou para a vista global de empresa é moi similar á prantexada para un só proxecto. O acceso a un proxecto pódese realizar de varias formas:
* Vista de planificación. Vista na que o usuario pode visualizar a planificación das tarefas, dependencias, fitos, etc. Ver sección de *Planificación* para máis información.
* Vista de carga de recursos. Vista na que o usuario pode comprobar a carga dos recursos asignados ó proxecto. O código de cores é o mesmo que na vista global de empresa: verde para carga menor ó 100%, amarelo para carga igual a 100% e vermello para carga maior a 100%. A carga pode vir dada por unha tarefa ou por unha lista de criterios (asignación xenérica).
* Vista de edición de pedido. Vista na que o usuario pode administrar os datos do pedido. Ver sección de *Pedidos* para máis información..
* Vista de asignación avanzada de recursos. Vista na que o usuario pode asignar os recursos de xeito avanzado, seleccionando as horas por día ou as funcións de asignación que desexa aplicar. Ver sección de *Asignación de recursos* para máis información.
"Navalpro" é un proxecto desenvolvido co obxectivo de dotar ó usuario dunha ferramenta de planificación que se basea nunha serie de conceptos, que forman parte das características que distinguen a aplicación e a definen como unha ferramenta deseñada tendo en conta os problemas clave do sector naval:
* Vista global de empresa e multiproxecto: "Navalpro" é unha aplicación orientada especificamente a dotar de información ós usuarios dos proxectos que se levan a cabo nunha empresa, polo que a base é multiproxecto. Non se determinou que o enfoque do proxecto sexa orientado individualmente a cada proxecto. Sen embargo, tamén será posible dispoñer de varias vistas específicas, entre elas a de proxectos individuais.
* Xestión de perspectivas: A vista global de empresa ou a vista multiproxecto vense complementadas coas perspectivas sobre a información que se almacena. Por exemplo, a vista global de empresa permite visualizar os pedidos e contrastar o estado dos mesmos, visualizar a carga xeral de recursos da empresa e administrar os pedidos. Por outro lado, na vista de proxecto, é posible visualizar a planificación, a carga de recursos, a vista de asignación de recursos avanzada e a edición do pedido relacionado.
* Criterios: Os criterios son unha entidade do sistema que permitirán clasificar os recursos (tanto humanos como máquinas) e as tarefas. Dende o punto de vista dos recursos, estes satisfarán criterios e, dende o punto de vista das tarefas, estas requirirán criterios a ser satisfeitos. Correspóndense con un dos aspectos máis importantes da aplicación, xa que os criterios formarán parte da base das asignacións xenéricas na aplicación, resolvendo un dos problemas máis importantes para o sector, a alta temporalidade dos recursos humanos e a dificultade para ter estimacións de carga da empresa a longo prazo.
* Recursos: Serán de dous tipos diferentes: humanos e máquinas. Os recursos humanos serán os traballadores da empresa que se utilizarán para controlar a carga da empresa e de uso dos mesmos. Por outro lado, as máquinas, dependentes das persoas que as xestionan, serán outros recursos que tamén serán controlables na aplicación.
* Asignación de recursos: Unha das claves é o feito de ofrecer a posibilidade de dous tipos diferentes de asignación: asignación específica e asignación xenérica. A xenérica é unha asignación baseada nos criterios que se lle establecen a unha tarefa para ser satisfeitos polos usuarios que teñen a capacidade de realizala.
* Control de carga da empresa: Baseado nos conceptos xa comentados, a aplicación dará a posibilidade de ter un control sinxelo da carga dos recursos da empresa a medio e longo prazo xa que se poderá controlar os proxectos presentes e os potenciais proxectos a futuro, visualizando as cargas en gráficos de uso de recursos.
* Etiquetas: Serán elementos que se usarán para o etiquetado das tarefas dos proxectos. Con estas etiquetas o usuario da aplicación poderá realizar agrupacións conceptuais das tarefas para posteriormente poder consultar información das mesmas de xeito agrupado e filtrado.
* Filtrados: Dado que o sistema disporá de xeito natural de elementos que etiquetan ou caracterízan tarefas e recursos, será posible utilizar filtrado de criterios ou etiquetas, o cal dotará de unha gran potencia para poder consultar información categorizada ou extraer informes específicos en base a criterios ou etiquetas.
* Calendarios: Os calendarios determinarán as horas produtivas dispoñibles dos diferentes recursos. O usuario poderá crear calendarios xerais da empresa e derivar as características para calendarios máis concretos, chegando ata a nivel de calendario por recurso ou tarefa.
* Pedido e elementos de pedido: Os traballos solicitados polos clientes terán un reflexo na aplicación en forma de pedido, que se estrutura en elementos de pedido. O pedido cos seus elementos conformarán unha estrutura xerárquica en *n* niveis. Esta árbore de elementos será sobre a que se traballe á hora de planificar traballos.
* Avances: A aplicación permitirá xestionar diversos tipos de avances. Un proxecto pode ser medido en porcentaxe de avance, sen embargo, pode querer ser medido en unidades, presuposto acordado, etc. Será responsabilidade da persoa que xestiona a planificación decidir que tipo de avance será utilizado para contrastar avances a niveis superiores de proxecto.
* Tarefas: As tarefas son los elementos de planificación da aplicación. Serán utilizadas para temporalizar os traballos a realizar. As características máis importantes das tarefas serán: teñen dependencias entre si e poden requirir criterios a ser satisfeitos para asignar recursos.
* Partes de traballo: Son os partes dos traballadores das empresas, indicando as horas traballadas e por outro lado as tarefas asignadas ás horas que un traballador realizou. Con esta información, o sistema é capaz de calcular cantas horas foron consumidas dunha tarefa con respecto ó total de horas presupostadas, permitindo contrastar os avances respecto do consumo de horas real.
* Integración con ERP: A aplicación importará información directamente dos ERP das empresas para os pedidos, recursos humanos, partes de traballo e certos criterios.
* Xestión de versións: A aplicación permitirá a xestión de diversas versións de planificacións e ó mesmo tempo a posibilidade de consultar a información de cada unha delas.
* Xestión de históricos: A aplicación non borra información, solo a invalida, polo que é posible consultar mediante filtrados por datas a información antiga.
Antes de realizar unha exposición das distintas funcionalidades asociadas ós módulos máis importantes, é necesario facer unha explicación xeral da filosofía de navegación e formularios.
* Formularios con botón de *Voltar*. Estes formularios forman parte de unha navegación máis completa, e os cambios que se van realizando vanse almacenando en memoria. Os cambios só se aplican cando o usuario almacena explicitamente toda pantalla dende a que chegou a dito formulario.
* Formularios con botón de *Gardar* e *Pechar*. Estes formularios permiten realizar 2 operacións. A primeira delas almacena e pecha a ventá actual e a segunda delas pecha sen almacenar os cambios.
* Formularios con botón de *Gardar*, "Gardar e Pechar" e "Pechar". Permiten realizar 3 operacións. A primeira delas almacena pero continúa no formulario actual. A segunda almacena e pecha o formulario. E a terceira pecha a ventá sen almacenar os cambios.
* Indentado esquerda: Xeralmente estas operacións son necesarias para elementos dunha árbore que se desexan mover cara niveis internos. Esta operación poderá ser feita coa icona formada por unha frecha cara a dereita de cor verde.
* Indentado dereita: Xeralmente estas operacións son necesarias para elementos dunha árbore que se desexan mover desde niveis internos cara externos. Esta operación poderá ser feita coa icona formada por unha frecha cara a esquerda de cor verde.
Existirán formularios de edición e administración de contidos que se atopan representados mediante compoñentes gráficos baseados en pestanas. Dita presentación é un mecanismo para organizar a información de un formulario global en diferentes seccións que poden ser accedidas premendo nos
títulos das diferentes pestanas, mantendo o estado no que se atopaban as demáis. En todos estes casos, as operacións de gardar ou cancelar que se executen afectarán ó conxunto de subformularios das diferentes pestanas.
Están implementados na aplicación compoñentes que proporcionan un texto descritivo adicional do elemento sobre que se atopa enfocado o transcorrer un segundo sobre os mesmos.
As accións que o usuario pode executar na aplicación están explicitadas tanto nas etiquetas dos botóns e nos textos de axuda que aparecen sobre os mesmos, nas opcións do menú de navegación ou nas opcións dos menús contextuais que se despregan o facer botón dereito na área do planificador.
Asimesmo, tamén se proporcionan atallos ás operacións principais facendo dobre click nos elementos que se listan, ou asociando os eventos de teclado cos cursores e a tecla de retorno ó desprazamento polos formularios é á acción de engadir elementos, respectivamente.
